काठमाडौँ । नेपाली कांग्रेसका सह–महामन्त्री महेन्द्र यादवले भारतीय दूतावासले नेपालमा २० करोड रुपैयाँसम्मका परियोजनामा सिधै अनुदान दिनसक्ने सहमति स्वागतयोग्य भएको बताएका छन् ।
नेपाल–भारत संयुक्त आयोगको बैठकमा भारतले बिहीबार भारतले सिधै लगानी गर्ने पाउने परियोजना रकमको सीमा ५ करोडबाट बढाएर २० करोड रुपैयाँ पुर्याइएको छ । उक्त सहमतिको विरोध भइरहेका बेला कांग्रेस सहमहामन्त्री यादवले स्वागतयोग्य भएको बताएका हुन् ।
नेपाल–भारत मैत्री युवा संघका केन्द्रीय अध्यक्ष समेत रहेका यादवले भने, ‘यसले नेपालमा विकास निर्माणका प्रक्रियाहरु तीव्ररुपमा अगाडि बढ्छ । यसले नेपाल र भारतको सम्बन्धलाई बलियो बनाउँछ ।’
सहमतिलाई सकारात्मक रुपमा लिएर विकास निर्माणमा सरिक हुनुपर्ने यादवको भनाइ छ । ‘कुनै देशले विकास निर्माणका लागि पैसा दियो । त्यो पैसा २० करोड होस् कि ५ करोड होस् । त्यो विकास नेपालमै हुन्छ । यसको विरोध गर्नुको औचित्य छैन,’ उनी भन्छन् ।
